logo

تحدي خَسِّسّني

 

نفسي أكون انسان عادي!

كُتب في ١ يناير ٢٠١٢

البِداية

انا اغلب عمري اعاني من زيادة الوزن و على الرغم من انه كان مصدر احراج و تريقة عليا و انا صغير في المدرسة إلا إن عمري ما كان عندي العزيمه الكافيه اني اغير الموضوع ده و كنت مقتنع ان دي صفه فيه مش ممكن تغييرها. لكن من فترة عملت تحليل دم و اكتشفت ان نسبه الكوليسترول عندي مرتفعة جداً و ان ده مؤثر على حياتي بشكل كبير و هنا بدأت كل حاجة تتغير.

فكرت انه زي ما انا اقدر اغير اي حاجة في افكاري اكيد هاقدر اغير عاداتي في اسلوب حياتي و الاكل اللي مسببلي كل المشاكل دي، علي رأي "أحمد حلمي" في فيلم "اكس لارج" انا بعمل كل حاجة في الدنيا بصعوبة، إلا الاكل! دي الحاجة اللي بعملها بسهولة جدا و بكون مستمتع جداً بيها و ده لأنها شهوه في الاساس. بس ولو...كفاية كده بقا!

بدأت ساعتها اعمل نظام حياه كامل مختلف و وصل وزني ١٠٨ كيلو بعد ما كان ١٢٥ كيلو و كنت في منتهى السعادة بصراحة إلا ان ده ماستمرش كتير لأني كاعاده ماقدرتش استمر!

الفكرة؟

الفكرة اني حللت اسباب تراجعي عن الريجيم و الرياضة و لقيت اني محتاج تحدي عشان انا عارف ان ده اللي هايدفعني للاستمرار فقررت اني اتحدى نفسي علانيةً و اقول للناس اني قررت اغير اسلوب حياتي و محتاج مساعدة الجميع و هشارك معاكم كل افكاري و اللي باتعلمه و باحسه خلال التحدي ده - حاجة كده زي تليفزيون الواقع - و اتمنى ان الناس على الانترنت تساعدني و تدعمني معنوياً لأني مش لاقي الدعم ده من اصدقائي و زملائي، و في النهاية لو الموضوع نجح هاتكون التجربة كلها مدونه و موثقة لأي حد عايز يستفيد منها.

الهدف

الهدف إني اخسر ٣٠ كيلوجرام و إنه يتغير اسلوب حياتي و امارس الرياضة بشكل مستمر و لا يكون الدايت هو حالة مؤقته و لكن يتحول اسلوب حياتي بالكامل ليكون صحي اكتر و ده هيساعدني من التخلص من آلام الركبه و الظهر المستمرين عندي و ان اكون خفيف الحركة. التحدي اني اغير نظام حياتي و اوصل للهدف... في اقل من ٩ اشهر!

الخطة؟

الخطة تبدأ من تشجيعك لي و لمشروع التحدي بالضغط على "لايك" و نشر الصفحة. ساعدني اني اشعر ان فيه ناس كمان بتفكر زيي و ان فيه ناس عندها استعداد تساعدني في التحدي ده يتضامنوا معايا لأن ده اللي انا محتاجه و ده اللي كتير محتاجينه زيي، كل ما يكون الدعم النفسي اكبر كل ما تكون الفرصة اعلى لتحقيق الهدف.

هاكتب هنا كل التجارب اللي هجربها و وصفات الاكل و التمارين الرياضية و هانشر التطور المستمر او التأخر في تحقيق الهدف و دوركم انكم ماتسيبونيش ابعد او ابطل. من الاخر كده انا عامل الموضوع ده عشان اتدبس :)

لو عندكم افكار او عايزين تشتركوا في التحدي معايا اكتبولي تعليق على الصفحة هنا في الاسفل.