logo

تحدي خَسِّسّني

 

نفسي أكون انسان عادي!

كُتب في ٣١ اغسطس ٢٠١٢

بعض الاسئلة الشائعة

سأحاول الاجابة على بعض الاسئلة التي تصلني باستمرار هنا لكي تكون تصل الإجابه للجميع

ليه باحس انك بتاكل اكتر من الناس اللي عامله رجيم في كل حته/ ليه بتاكل بطاطس مش المفروض البطاطس ممنوعه؟

هذا النوع من الاسئله بيجيلي كتير جداً، ناس تقوللي "ايه ده، انت بتاكل جزر عادي كده؟ ده الدكتور مانعني من كل الكلام ده". الحقيقة ان هو ده كان سبب فشلي سنين طويله في موضوع التخسيس و هو اني كنت بسمع كلام "الجهلاء" و لما بدأت اقرأ في الموضوع و افهم تدريجيا ازاي اهتم بأكلي و بالتالي اهتم بصحتي بدأت افهم شويه قواعد مهمة جداً.

  1. الإفراط في أي شئ مضر، قاعدة ذهبيه جوهريه محوريه، مهما كان الشئ مفيد ففي الكثره المفرضة يكمن الضرر
  2. كل الخضروات و الفواكه مفيدة، لكن مكوناتها مختلفه عن بعضها، يعني بعضها يحتوى على نشويات اكثر من الاخر لكن في النهاية كلها مفيده و اذا اكلت اي نوع باعتدال مش هاتكون هناك اي مشكله على الاطلاق. بعض الامثلة على كده (البطاطس، القلقاس، الجزر، البصل، العنب، التين، المانجو، المشمش، المكسرات) دايماً حاول تنوع، ده اللي هايخليك ماتاكلش من نوع واحد لدرجه الافراط
  3. طريقة الطبخ اهم بكتير من المكونات، يعني مثلاً، اي حاجة مشويه كويسة! طالما مافيش فيها اي دهون او بدون اي دهون اضافيه. البطاطس تكون مضرة جداً لو اتعملت بطاطس محمرة في الزيت لكن في نفس الوقت تكون مفيدة و صحيه لو اتعملت بدون دهون او في الفرن من غير زيت او سمن زي الممتازة اللي موجودة على موقع نقنقة

نفسي في الشيكولاته/الحلويات/المقليات اوي، اعمل ايه؟

بص، اول حاجة لازم تفهمها ان "نفسك" دي هي اللي وصلتك انه بقيت بالوزن و الشكل اللي انت فيه دلوقتي ده، و هي دي اللي احنا عايزين نغير عاداتها، ممكن تاكل اللي انت عايزو و تفضل بالشكل ده و يمكن اسوأ و ممكن "تدوق" اللي انت نفسك فيه كل مده او تخليها مكافئة لما توصل الوزن المثالي :)

من الآخر ماتحرمش نفسك لكن ماتسيبش "نفسك" تتحكم فيك، كل شويه كل حاجة بكمية صغيره جداً من اللي كان نفسك فيها و اعمل القصة دي كل يوم جمعة مثلاً و حط لنفسك شرط ان في الجمعة الواحدة ماتحققش اكتر من امنيه في نفس الوقت، يعني تختار الجمعة دي بين الشيكولاته (اللي انت هاتاكل نص الباكو بس) و بين البسبوسه (اللي انت هتاكل منها قطعه صغيره) و الصنف التاني خليه الاسبوع اللي بعده و هكذا

انا متجوز و مراتي بتعملي اكل لوحدي و هي بتاكل كل اللي نفسي فيه قدامي، ده صح؟

بص يا باشا، السر الحقيقي في انك تنجح في انك تخسر الوزن اللي مبوظ حياتك ده هو ان يكون ماعندكش اختيار انك تغلط، و ده مش هايحصل الا اذا كانت التلاجة مثلاً مافيش فيها غير اكل صحي و اختيارات كلها صحية و ان كل اللي بيتحط على السفرة يكون صحي و بالكميات المناسبة يعني ماتحطش حلة رز و تقول انا هاكل معلقتين، حط معلقتين في الطبق من المطبخ و حدد اكلك باللي انت حطيته في الطبق. مراتك او اسرتك لازم تساعدك بجد، ده شخصياً اللي انا بعمله و كل الطرق التانيه فشلت معايا.

احل ازاي مشكله الجوع، على طول جعان و لما باكل الكمية القليلة بافضل جعان، اعمل ايه؟

الجوع له اسباب كتير منها النفسي و منها الجسدي، لو جعان طول اليوم يبقى في الغالب عادات اكلك هي السبب، انت اتعودت انك لما تكون زهقان تاكل او لما تكون بتشتغل تاكل و انت بتشتغل بحجة ان ده بيخليك تركز. ده لازم يتغير لو فهمت معلومة سحرية

لو اكلت اي حاجة مهما كنت جعان، بعد ٢٠ دقيقة على الاكثر احساس الجوع هايختفي! هي دي الطريقة اللي جسمك بيشتغل بيها، كل الكمية المناسبه و استحمل على الاكثر لمدة ٢٠ دقيقة و ادعيلي :)

انا مش هاطول عليكم لكن لو عندك اسئلة ابعتلي و ان شاء الله ارد عليك سواء هنا او علي صفحة خسسني على الفيس بوك