logo

تحدي خَسِّسّني

 

نفسي أكون انسان عادي!

كُتب في ٢٢ يونيه ٢٠١٢

ملخص تاني ثلاث اشهر

منذ ثلاث اشهر بالظبط كتبت عن ملخص اول ثلاث شهور في تحدي خسسني و في الوقت ده طلعت في دماغي فكره الفيديوهات القصيرة و كان عندي حماس و سعاده شديده باللي انا حققته و في الوقت ده انا كنت خسرت ١٤ كيلو و النهاردة انا عايز اكلمكم عن الثلاث شهور التانيه في التحدي و كده يبقى فاضل كمان تلات شهور على نهاية التحدي ان شاء الله

Ahmed after 6 months

انا دلوقتي وصل وزني ٩٣ كيلو يعني خسرت بشكل اجمالي ٢٣.١ كيلو من البداية و تقريبا ٩ كيلو في الثلاث شهور الاخيره و فاضللي تقريبا ١١ كيلو على الهدف المفروض احققهم في الثلاث شهور القادمة لكن انا من البداية كنت حاطط ٥ كيلو احتياطي يعني انا عايز اخس من ٣٠ الى ٣٥ كيلو، لو وصلت لأي رقم في النص بين ال ٣٠ و ال ٣٥ كيلو هاكون سعيد و نجحت في التحدي. ان شاء الله اسوء الظروف اني اخسر ٧ كيلو و لو اشتغلت بمجهود زيادة شويه ممكن احقق ال ١١ كيلو ان شاء الله.

طبعاً الشيء الاساسي في التلت التاني هو ان معدل خسارة الوزن اقل من الثلث الاول و ده انا كنت متوقعه و بناءً على الدراسه اللي عملتها قبل ما ابدأ كان قرار اني احدد التحدي بإنه ٩ شهور عشان يكون معدل خسارة الوزن طبيعي و مايأثرش على صحتي و كمان يكون منطقي مش تحدي خيالي يصيبني بالإحباط. و عشان كده الثلث اللي جاي انا متوقع اسوء الظروف اني اخسر ٧ كيلو بس يعني اقل من الثلث ده. لكن انا مش هاكون محبط بالعكس هاكون في غايه السعاده ان شاء الله

تحديات جديده و غير متوقعة

في الفتره دي كانت التجربه اصعب بكتير من الثلث الاول لأن في الفترة دي مصر كلها كانت بتمر بظروف صعبة للغاية (و لازالت) و الاكتئاب الشديد اللي انا كنت مصاب بيه اغلب الفتره دي كان له تأثير جديد ماقابلتوش في الثلث الاول و كمان ماكنت متوقعه و كنت متخيل انه سهل التغلب على ارتباط الحالة النفسية بالأكل لكن الموضوع كان اصعب بكتير قوي يعني عن تخيلاتي و توقعاتي.

في الفترة دي كانت بتجيلي نوبات متقطعة مع الضيق الشديد من الاحوال الثورية و طبعاً أغلبكم عارفها و أصابه حالة مشابهه و أحيانا الواحد كان بيفكر في الهجرة و خلافه و ده كان تأثيره عليا كالتالي:

  1. حالات مفاجئة و متكرره من ان نفسي في حاجة حلوه (شيكولاته او رز بلبن او ايس كريم بشكل اساسي مش عارف ليه) و في حالات مش قليله ماكنت بقدر اسيطر على الاحساس ده علي الرغم من اني لازلت ملتزم بالنظام الصحي و كل حاجة لكن احساس ان ماعدش فيه حاجة فارقه و انك عايز اي حاجة تديلك متعه مؤقته تنسى بيها همومك ده رهيب، فعلاً احساس داخلي مش سهل السيطرة عليه.
  2. حالات من الجوع الشديد و اني اكل بكميات كبيره جداً في ايام معينه و خصوصاً الاكلات اللي فيها دهون كتير، زي البطاطس المحمرة و اللي انا كنت اصلاً نسيت طعمها و غيرها
  3. إني اكل و انا مش جعان، بالعكس ممكن اكون شبعان جداً لكن باكل و مش عارف اوقف اكل طول اليوم، و عمال على بطال "بنقنق" و مش قادر اوقف
اتعلمت شويه طرق كده عشان اسيطر على الاحساس ده و على النوبات دي و ده اللي انا عايز اشاركه معاكم لأنه كان مفيد نسبياً معايا و قدرت في النهاية اوصل للهدف على الرغم من اللخبطة دي

  1. انك تشتغل على انك تحل المشكله النفسية الأصلية لو حاسس بالإحباط مثلاً يبقى لازم تتكلم مع حد من اصدقائك و دي فرقت معايا جداً، الحل مش في الاكل، صعب تسيطر على اكلك طول ما انت في الحالة النفسية دي، الحل انك تطلع منها بأسرع وقت
  2. الرياضة، انا اكتشفت بالدليل العملي و العلمي اني لما بعمل اي نشاط رياضي حالتي المزاجيه بتتحسن جداً و ده بيساعد على انك تطلع من المشكله النفسية لكن طبعاً مش بيحلها، الرياضة أو حتى المشي له تأثير ممتاز على التخلص من الحالة المزاجية السيئة.
  3. اقتل وقت فراغك بعمل اي شيئ مفيد و يا ريت مايكونش تحت ايدك اكل او شرب، يعني ماتروحش مثلاً تشتغل في كافيه لأنك لازم تطلب حاجة عشان تقعد و هايكون دايماً عليك ضغط نفسي انك لازم تفضل تطلب طول ما انت قاعد عشان المكان و كده. عشان كده انا بحب اقعد سواء في البيت او في الشركه :)
  4. ساعات كتير ممكن الخبط في الاكل و كده لمده قد تصل الى اسبوع بحد اقصى (طبعا انا اصلاً ضميري بيفضل يأنبني طول مانا باكل فبكون دايماً باكل قليل كتير عن زمان) و بعد الاسبوع ده اوزن و اقيس نفسي الاقي ان وزني ماتغيرش، طبعاً دي مسألة خطيرة جداً و انت بتحس انك لو اكلت اللي انت نفسك فيه وزنك مش هايزيد و بيكون دافع للتمادي خصوصاً و انت في الحالة المزاجية السيئة، لكن الحقيقة ان فيه تفسير علمي للموضوع ده و هو ان جسمك بعد فتره بيكون اتعود على النظام ده و لما بيجيله اكل اكتر من الطبيعي بيرفض انه يخزن دهون (زي بالظبط العكس لما تكون تخين و تحاول تخس ممكن تقعد كذا اسبوع على ماتبتدي تخسر وزن) و قبل كده من حوالي اربع سنين كنت وقعت في الفخ ده و كانت النتيجة اني تدريجياً قعدت ازيد لحد لما وصلت ١٢٥ كيلو! عشان كده كل مايحصل كده افتكر و ارجع تاني للنظام المظبوط و الرياضة

طبعاً انا مش عاوز اطول على حضراتكم لكن التغيير الاكبر في الشكل دايماً بيكون في بداية الدايت عشان كده مش بالضرورة تلاقي الناس حاسه بالتغيير في جسمك زي لما يشوفوك بعد اول شهر مثلاً، لكن لو حد ماشافاكش من مده كبيره هاينبهر. اهم حاجة انك دايماً تحط في دماغك بعد ماتكون خسرت جزء معتبر من وزنك إن

عقارب الساعة -إن شاء الله- لن ترجع إلى الوراء