logo

تحدي خَسِّسّني

 

نفسي أكون انسان عادي!

كُتب في ٢٢ مارس ٢٠١٢

ملخص اول ثلاث اشهر

بقالي ثلاث اشهر دلوقتي عامل نظام غذائي صحي و عايز الخص لكم اللي انا كنت بعمله و كل التفاصيل عشان ناس كتير كانت بتسأل على صفحة الفيس بوك. انا عارف اني بقالي كتير مش بكتب هنا لكن انا حالياً بحضر اني اعمل فيديوهات قصيرة فيها شرح مبسط لأساسيات الدايت و ازاي انت المفروض تغير طريقه تفكيرك، ان شاء الله هاتنزل قريباً.

في الثلاث الشهور الأولى من بداية فكرة خسسني، خسرت ١٤ كيلوجرام. وزني نزل من ١١٦.٨ الى ١٠٢.٨ و ده كان له تأثير كبير جداً على الآتي:

  1. ثقتي بنفسي زادت جداً و احساسي اني اقدر احقق اي تحدي او عائق اصبح قوي جداً. المظهر الخارجي مؤثر جداً في تعاملك مع الناس و بينعكس على احساسك بالثقة. لو ماكنتش بتحس بالثقة و انت باصص في المراية مش هاتحس بالثقة قدام حد. صحيح اللبس الواسع برضوا ياما بيداري لكن احساس مختلف بجد ان يكون جسمك متناسق و مافيش حاجة شكلها غريب في جسمك. صحيح انا لسه مش رشيق يعني لكن جسمي اصبح متناسق بشكل معقول و فعلاً ده أثر على نفسيتي جداً و بقا عندي احساس بالسعاده اكبر بكتير الحمد لله، و طبعا ده كان باين جداً و انا رايح اشتري بنطلون جديد بعد ما اللي عندي بقوا زي الشوال عليا (اضطريت اضيقهم كتير) و انا طبعاً متعقد من موضوع اني اشتري بنطلون و طول الوقت كنت بحاول اتجنب اللحظة المأسوية دي عشان دي اللحظة اللي بكتشف فيها قد ايه انا تخين و مش لاقي اي حاجة مقاسي و كنت باضطر اشتري اي حاجة المهم تكون مقاسي. فكرة بقا اني اشوف لون مناسب او خامة مريحة او اي حاجة من دي كانت خياليه بالنسبالي انا لو لقيت اي حاجة مقاسي باجيبها. كنت زمان باشتري بنطلونات مقاس ٤٤ دلوقتي بالبس ٤٠ و مش بس كده، بقيت بختااااااار. اه و الله، يعني بانقّي بقا و كده، اي و النعمه و كمان جيبت بنطلونين بألوان مختلفه. اصلا كنت حاسس اني باجرب حاجة جديدة، موضوع اني اقيس بنطلونات مختلفه و باختار القصة الاحلى و اللون الالطف. احساس حلو جداً.
  2. احساس بالنشاط، الحاجة الأهم بصراحة هي اني حاسس اني نشيط طول اليوم و مش مرهق زي الاول و برجع البيت بعد الشغل عندي طاقة اعمل حاجات تانيه.
  3. زمان كنت بعد لما باكل باحس بالخمول و اني عايز "أئنتخ" دلوقتي لما باكل خفيف و اكل صحي ممكن انزل اجري و امشي من غير ما احس بأي مشكله و ممكن بعد الاكل أعمل اي نشاط طبيعي.
  4. خسارة الوزن واضحة جداً عليا و كل الناس مبسوطين و بيشجعوني بشكل او بآخر، حتى الناس اللي كانت بتحبطني زمان دلوقتي شايفين الفرق، طبعا اخطر حاجة هي اني احس اني كده تمام و الناس مبسوطه و ابطل او اوقف لكن بالعكس، خوفي من اني ارجع للخلف كبير جداً و مخليني عايز دايما ابذل مجهود اكبر لأني دلوقتي في نص السكه - او تقريباً اقل من النص قليلا -

الفكرة الأساسية اللي انا اتعملتها في اول تلات شهور هي ان الدايت مش حاله استثنائيه، هو تغيير في حياتك انك تكون عايش اسلوب حياه صحي Healthy Lifestyle و يفرق كتير قوي، يعني انا مش باحلم باليوم اللي ابطل فيه النظام ده او اني باحلم باليوم اللي اكل فيه الاكل اللي انا باحبه لأن اللي انا باكله دلوقتي اصبح هو اللي باحبه و الاكل بتاع زمان ده مش باحبه لأنه كان بيخليني تقيل و تعبان و كمان بيزود وزني اللي انا جربت تأثيره على كل حاجة في حياتي، انا قررت ان اسلوب الحياه ده يكون هو اسلوب حياتي للأبد مش مجرد فتره دايت و لو في وقت محتاج اكل حاجة مش صحيه قوي هايكون هو ده الأستثنائي مش الدايت.

طيب، لما بيكون فيه قدامي اكل من الفظيع المريع الحلو الخطير اللي انا "كنت" باحبه جداً و هو مضر جداً و كده بيطلع منادي في دماغي يقوللي "اوعي تضعف" و "قوة الأرادة" و الكلام العسل ده و الحقيييقة المرة إن "الإنسان دعييييف" :) و كل مره ده يحصل باكل من الاكل ده لكن في الغالب باكل قليل. طيب الحل ايه و انا ماعنديش اي اراده كده؟؟ الحل بسيط، ماتروحش اي مكان فيه الاكل ده و ده لو في البيت يبقى ترميه و تتخلص منه و تبعد عنه. هو ده الحل اللي اشتغل معايا.

لا زالت ناس كتير بتسألني ناكل ايه و ماناكلش ايه و ايه نظام الاكل اللي بتمشي عليه و كده و الموضوع ده محتاج شرح طويل عشان كده عملت اتفاق مع موقع وصفات أكل تديره زوجتي العزيزه اننا نصور اكلات صحيه و يكون الموقع كله عن الاكل الصحي عشان يكمل الكلام اللي هنا. هاقوللك عنه تفاصيل اكتر قريب ان شاء الله. دعواتكم اني اكمل و على الصيف يكون شكلي الى حد ما رياضي و انزل البسين براحتي بقا :)