logo

تحدي خَسِّسّني

 

نفسي أكون انسان عادي!

كُتب في ١٣ يناير ٢٠١٢

آكل ايه؟!

دايماً لو الواحد بدأ دايت بيحس ان الدنيا بقت ضيقه و ان ماعدش فيه اي اكل ممكن ياكله و ساعات بيكون مش عارف هو ايه الاكل المناسب و ايه لأ و يختار ازاي لو راح مطعم او لو هو اللي بيطبخ اكله مش عارف ايه اللي الفروض يعمله عشان يخلي اكله صحي اكتر و كمان يخسر وزن.

المكونات المهمة

لما تيجي تاكل او تختار اكل او حتى تطبخ، مهم جداً انك تعرف ايه المكونات المضرة اللي انت محتاج تبعد عنها و كمان نستبدلها بإيه. هحاول اقولكم تجربتي و اللي انا بعمله شخصياً و مستني تعليقاتكم

  • الدهون (السمنه، الزيت، الدهون اللي في اللحوم): مهم جداً انك تفهم ان تأثبر الدهون مهم جداً جداً جداً على صحتك، الابتعاد عن الدهون المشبعة و اللي من اهم اسبابها "القلي" و دي من اسوأ طرق التسوية، ماتاكلش حاجة مقليه لأن اولاً لأن السعرات الحرارية للأكل بيتضاعف حتى اربع اضعاف مع القلي عن لو اكلت نفس الاكل مشوي او مسلوق، ثانياً لأن الاكل المقلي يحتوى على نسبه عاليه من الدهون المهدرجة و المشبعة. الحل الافضل هو ان تأكل لحون بدون دهون على الاطلاق (حاول مثلاً تبعد عن اللحمه المفرومه عند الجزار، حاول تفرم اللحمه بدون دهون نهائياً )، استخدم دايماً زيت الزيتون لأنه بيقلل من الكوليسترول في الدم و مفيد جداً للجسم لكن بدون تسخين، يعني ماتقليش فيه حاجة مثلاً لكن استخدمه في الاكل بشكل عادي. القلي في زيت الزيتون افضل من الزيت العادي لكن مش كتير. الزيت الحار برضو من الحاجات الممتازه و مفيد جداً للكوليسترول. فلو هتاكل فول مثلاً، اختار دايماً العيش البلدي و الفول بزيت الزيتون او الزيت الحار و بلاش الطحينه الله يكرمك :)
  • الدقيق: دايماً استخدم دقيق كامل (الدقيق البني) او الرده، ابعد على قد ما تقدر من العيش الفينو و الشامي، العيش البلدي الاسمر اللي معمول بالرده ممتاز و بيحسس بالشبع و مليان الياف لكن المخبوزات بالدقيق الابيض بتعمل ارتفاع مفاجئ في السكر في الدم و ده بيخلي الجسم يخزن الدهون، كمان مافيهاش الياف فمش هاتحس بالشبع و مش هاتستفيد منه. مع ان العيش انواعه متشابهه في الشكل و في الغالب في الطعم لكن الفارق كبير جداً جداً في القيمه و التأثير.
  • زيت النخيل... مهم جداً جداً انك تبعد عنه لأنه بيرفع نسبه الكوليسترول في الدم و بالمناسبه في انواج جبن كتير بتتعمل منه، اقرا المكونات لما تشتري اي نوع جبنه و ابعد عن اللي معموله بزيت النخيل.
  • البيض كويس لو مسلوق لكن لاحظ ان صفار البيض فيه محتوى عالي من الكوليسترول فمتزودش من البيض المسلوق لو بتعاني من ارتفاع الكوليسترول في الدم.
  • الجبنه من الحاجات المهمه جداً انك تعرف الفرق بين انواعها و تأثيرها: الجبنه من المصادر الاساسية و الشهيرة اللي بتسبب ارتفاع في الكوليسترول في الدم، الدسم في الالبان تجنبه بشكل تام، لاحظ ان اي جبنه مالحة (حادقة) بيتكون عاليه الدسم او تكون جبنه كريمي دي برضو عاليه الدسم. الافضل انك تجيب جبنه قريش و تملحها بسيط مع زعتر و شويه زيت زيتون - جعت لما فكرت فيها اصلاً :) - أو جبنه قريش مع زيت حار. ممكن تستخدم جبنه فيتا لايت و فيه كمان فلمنك لايت. الجبنه الممتازه لكن الاقبال العام عليها قليل هي الجبنه الزرقا (روكفور) و دي فعلاً ممتازة و صحيه جداً.

مهم جداً انك تكون كمان عارف ايه الحاجات الكويسه اللي لما اكلها تفيدني و ماتخنيش و ممكن اكلها لما اجوع.

  • الخضروات بكل اشكالها! و خصوصاً الخضروات الورقية (الجرجير، البقدونس و خلافه) لكن المهم ان تكون طريقة تسوية الخضار ده بدون اي دهون، اعمل فيها اللي انت عايزه لكن بدون زيت او سمنه. بعض الاحيان قليل من زيت الزيتون بيكون ممتاز.
  • الفاكهه بكل انواعها: الاناناس و الكيوي ممتازين و بيساعدوا على رفع مستوى حرق الدهون، البرتقال بيشبع في الصعب حالات الجوع. التفاح دايماً كان بيعمل نتيجة ممتازه
  • التونه و الاسماك، ماعدا الرخويات (الجمبري و السبيط و خلافه) السمك طبعاً يكون مش مقلي و معمول بدون دهون اضافيه. الجمبري بيرفع من الكوليسترول.
  • الفراخ (الدجاج) من اكثر الاكلات المفيده و الصحيه خصوصاً اذا كانت بدون دهون اضافيه على الاطلاق.
  • اللحم الاحمر الخالي من الدهون ممتاز و مصدر اساسي للبروتين الحيواني

طبعاً الاكل كتير جداً و كل شويه هاتكلم عن اكله معينه، لكن انا عمل التدوينه دي عشان في ناس كتير عايزه تعرف تاكل ايه و النظام الغذائي بيكون ازاي فأنا بحاول اني اوصف انا باختار اكلي ازاي و بعدين هاكتب امثله عن الاكل الاعتبادي اللي باكله اليومين دول و خططتي المستقبليه ان شاء الله.