logo

تحدي خَسِّسّني

 

نفسي أكون انسان عادي!

كُتب في ١١ يناير ٢٠١٢

الجدول اللي مالوش لازمة!

يالا...لأول مرة هاتتعلم تقرا الجدول اللي "انت كنت فاكر ان" مالوش لازمة ده. الجدول اللي بيبقى مكتوب على اي مأكولات جاهزة او علبة اي حاجة بتشتريها من السوبر ماركت و اللي اسمه "حقائق غذائية" او بالانجليزي Nutrition Facts و الجدول ده المفروض انه بيقولك المكونات الغذائية للحاجة اللي انت بتشتريها و طبعا كل حاجة من الحاجات المكتوبه دي مهمة جداً ليك بما انك قررت معايا انك تأكل صحي و تخس :) الهدف من التدوينه دي اني احاول اقولك ايه اللي تبص عليه و ايه المعلومات المهمه اللي لازم تكون عارفها عن الاكل.

الاول خليني اقول ان فيه كذا طريقة لذكر الحقائق الغذائية، منها:

  • ذكر المحتوى الغذائي للعبوه بالكامل، يعني يقولك مثلاً ان العبوه دي تحتوي على ٥٠٠ سعر و الجدول مكتوب تحتها، و هنا هو يقصد انك لو اكلت العبوة كلها يبقى اللي هايدخل جسمك هو كل محتويات الجدول ده و في الغالب المحتويات بتكون مكتوبه كأرقام بالملي جرام مثلاً او كده.
  • ان يكون مكتوب ان الجدول ده لوزن معين او مثلاً يقولك انه per serving و ده معناه انه عامل حسابه مثلاً انك مش هاتستخدم العبوه كلها مره واحده يعني لو جبنه مثلثات مثلاً ممكن يقولك المثلث الواحد قد ايه أو مثلاً في علبه التونه يقولك ان التقديم الواحد حوالي ٨٥ جرام و العبوه ١٧٠ جرام مثلاً و يكتب الجدول كله للمقدار ده.. اللي هو ٨٥ جرام.
  • الطريقة التالته انه يقولك ان كل القيم المكتوبه عبارة عن نسب مئويه من اللي انت المفروض تاخده في اليوم و بيكون مبني على حميه من نوع معين و ده من رأيي من اكتر الطرق تضليلاً لأنها بتحاول تضحك عليك، يعني انت لما تلاقي مثلاً ان الدهون ٥٪ من الدهون اللي انت المفروض تاخدها في اليوم تحس بالسعاده و تاكل البتاع ده و انت منشكح مع انه انت مش واخد بالك انت باقي الدهون في اكل باقي اليوم ايه أو الحمية اللي هو حاسب عليها دي شكلها ايه.

طبعاً كل جدول على رأسه مجموع السعرات الحرارية حسب اللي انا شرحته من شويه، العلبه كلها او نسبة مئويه او لوزن محدد. المهم كمان هو انك تعرف معنى المكونات التانيه و ايه المفيد و ايه المضر.

  • الدهون الكليه (Total Fat) و دي مجموع الدهون الكليه لكن مهم جداً انك تعرف ان الدهون اربع انواع رئيسية مهم جداً انك تفرق بينهم
    1. Saturated Fat (الدهون المشبعة): و هو من اخطر انواع الدهون و دي بتيجي من الاساس من الطعام الحيواني او الاطعمة المنتجة من الحيوانات و سبب الخطورة انها بترفع نسبة "البروتين الشحمي القليل الكثافة" و ده في منتهى الخطورة و هو من احدى الحاجات اللي انا شخصياً أعاني من ارتفاعها بالدم. وهو من احدى مكونات الكوليسترول و يساهم بشكل اساسي في امراض القلب و الشرايين و السكر!
    2. Trans Fat (الدهون مهدرجة): في بعض الاحوال يطلق عليها انها الدهون الصناعية او المصنعة او التخليقية و دي بتنتج خلال عمليه صناعة او الهدرجة الجزئية للدهون الغير مشبعة و هي ايضاً خطيرة و ضارة و تزيد احتمالية الاصابة بأمراض القلب.
    3. Monounsaturated Fat (دهون غير مشبعة احادية): و هي دهون مفيدة و تخفض نسبة الكوليسترول في الدم و تساهم بشكل ايجابي في حالات امراض السكر (السكري)
    4. Polyunsaturated fat (دهون غير مشبعة متعددة): و دي موجودة في الزيوت النباتيه و هي ايضاً مفيدة و بتساعد على تحسين مستوى الكوليسترول في الدم و احدى انواع الدهون الغير مشبعة هي "اومجا ٣" و دي مشهورة جداً للعامة لكن الناس مش عارفه انها دهون اصلاً و دي موجودة في مواد غذائية كتير هاذكرها في تدويناتي اللاحقة ان شاء الله.
  • الصوديوم: و هو بإختصار، الملح! و الملح مضر للجسم لأسباب كتير لأنه بيزود نسبه المياه في الجسم و بيرفع من ضغط الدم و امراض الكلى! ملعقة الملح فيها ٢٣٠٠ ملي جرام من الصوديوم و ده هو نفس الحد المسموح بيه طبقاً لأحدث الابحاث، يعني من الاخر انت محتاج ٢٣٠٠ ملي جرام صوديوم في اليوم كله مش في اكله واحده!
  • Carbohydrate (الكاربوهيدات) و هي من المصادر التي يحولها الجسم إلي سكر في الدم و تساعد الجسم على تكوين الدهون و السمنة بشكل عام و هي من مصادر الطاقة الاساسية للجسم لكن هي في حقيقة الامر نوعان (كاربوهيدرات بسيطة و مركبه) و دي برضو محتاجة شرح في مره تانيه
  • Protien (بروتين): و هر من العناصر الهامة للغاية للجسم و تساعد على بناء العضلات و المصدار الشهيرة للبروتين هي اللحوم و الاسماك لكن مع مراعاة ان تكون بدون دهون.

طبعاً انا تعبت من الكتابه بس الموضوع فعلاً مهم و الجدول ده ماينفعش تتجاهله، بالعكس لازم تكون عارف كل حاجة انت بتاكلها و من الحاجات اللي انا بقيت بعملها هي مقارنه الاكل مع بعضه، يعني مثلاً مقارنه انواع الزبادي مع بعض و الجبنه مع بعض و كده عشان اعرف الافضل بالنسبالي خصوصاً فيما يتعلق بالدهون و الكوليسترول. اتمنى تكون المعلومات مفيده و تساعدك انك تختار اكلك بشكل سليم حتى لو مش عايز تخس زي حالاتي.