logo

تحدي خَسِّسّني

 

نفسي أكون انسان عادي!

كُتب في ٩ يناير ٢٠١٢

كل اكتر و ابعد عن المجاعة!

لما بنبدأ الدايت بنعمل جدعان قوي و تلاقينا مش عايزين ناكل خالص و بناكل كميات قليله جداً و بعض الدكاترة العباقرة تلاقية عاملك فطار خُمس رغيف عيش بلدي من اللي بشلن ده و ٢ جرام جبنه و الكلام .اللي كلنا حافظينه ده و المفاجأة بقا ان كل ده كلام فارغ و بعيد تماماً عن الصحة و ده اللي انا عايز اثبته و اشرحه بالتفصيل في التدوينه دي.

وقود جسم الانسان هو الاكل اللي بياكله طوال اليوم و الوقود ده بيتقاس بالسعر الحراري و الانسان بيستهلك السعرات الحرارية دي في نشاطه اليومي من حركة و عمل و خلافه بالإضافة إلى ان الوظائف الحيوية لجسم الانسان بتستهلك سعرات حرارية و ده ال معروف علميا ب Basal Metabolic Rate (BMR) و هو ببساطة السعرات اللي الجسم بيسهلكها في كل الاحوال حتى لو فضلت نايم طوال اليوم من غير حركة انت ممكن ببساطة تحسب معدل الحرق الاساسي BMR من خلال الموقع ده Calories Calculator و الخلاصة انك لو اكلت ما يعادل ٣٠٠٠ سعر في اليوم و انت ال BMR بتاعك ٢٠٠٠ يبقى انت محتاج تحرق ١٠٠٠ في صورة نشاط يومي لأن فيه ٢٠٠٠ الجسم هايحرهقم كده كده الباقي الجسم هايحطه في البطارية - اللي هي الدهون اللي بيكونها الجسم - عشان يستخدمها في وقت تاني. طبعاً مش السعرات فقط هي الحاجة المهمة في الاكل لكن انا هاتكلم عن الموضوع ده في تدوينه تانيه.

الحقيقة ان جسم الانسان اذكي بكثر مما تتوقع - سبحان الله - فأنت لما بتاكل اكل اقل من ال BMR بتاعك بكتير أو لما تفضل مدة طويلة من غير اكل، بينزل معدل السكر في الدم و مع تكرار الموضوع ده اكثر من مره بيدخل الجسم فيما يسمى ب وضع المجاعة و الجسم في الوضع ده بيحس ان فيه مجاعه و ان الاكل قليل جداً و هو مش ضامن المستقبل فبيقتصد في حرق الدهون الموجودة و بينزل معدل الحرق - Metabolism - الى مستويات منخفضة جداً و معدل السكر في الدم بيكون منخفض و ده اللي بيأدي إلى ان الناس اغلبها لما بتروح عند دكتور الرجيم اللي مش فاهم كويس بتخس اول اسبوع بمعدل كبير و بعدين يدخل الجسم في وضع المجاعة و معدل نزول الوزن بيكون قليل جداً و اغلب الدكاتره في الحالة دي بتقلل الكميات اكتر، يعني تلاقي تاني اسبوع الاكل في البرنامج نص اللي كان في الاسبوع الاول و النتيجة بتكون انك محبط اكثر و جعان اكتر و مش بتخس فبتبطل الدايت اللي جايبلك الهم ده :)

طيب، ازاي نخلي الجسم مايدخلش في وضع المجاعة؟

ببساطة انت محتاج تاكل كتير!...ايوه و الله :) انا عارف انك مش مصدق نفسك بس هي دي الحقيقة. انت محتاج انك تقسم اكلك بحيث يكون ٦ وجبات في اليوم بمعدل تقريبي كل ثلاث ساعات تاكل حاجة بس بشرطين

  • مايكونش فيه وجبتين متلاحقتين عاليه السعرات، يعني حاول تكون الوجبه اللي سعراتها عاليه بعدها و قبلها وجبه خفيفه snack يعني زي برتقاله او تفاحة مثلاً او زبادي و كده. و انه يكون مجموع السعرات في اليوم كله لا يزيد عن ال BMR بتاعك بأي شكل و يستحسن لو اقل قليلاً
  • ان تكون اخر وجبه قبل النوم بثلاث ساعات على الاقل يعني تنام خفيف

يعني مثلاً انا حالياً باكل سندويتشات تونه في عيش بني Brown Bread فينو بس بني و بعمل علبه تونه تقريبا ٢٥٠ سعر على سندويتشين بقسمهم اتنين يعني اربع قطع الفطار تفاحة مع ساندويتش منهم و الضهر كمان نص مع فلفل ملون و العصر نص و المغرب نص مع تفاحة و ارجع البيت اكل العشان تقريباً الساعة ٧:٣٠م و ده تقريباً حوالي ٥٠٠ سعر و العشاء ده ممكن يكون ٥٠٠ زيهم يعني انا كده باكل ١٠٠٠ سعر في اليوم و انا اصلاً محتاج ٢٣٠٠ سعر عشان ال BMR بتاعي كده، بس انا باعمل كده بس الاسبوع الاول و الاسبوع التاني هايكون اكلي زياده عن كده و هازود الحرق بالرياضة. المرة الجايه اكلمك اكتر عن الخطة القادمه ان شاء الله :)

معلومات اكتر عن رد فعل جسم الانسان في وضع المجاعة هاتلاقوها هنا رابط Wikipedia