logo

تحدي خَسِّسّني

 

نفسي أكون انسان عادي!

كُتب في ٨ يناير ٢٠١٢

محاربة الاحباط

في اليومين اللي فاتوا بحاول اني دايماً افكر نفسي ان عملية التخسيس دي عمليه طويلة و بطيئه و بحاول اني احارب شخصيتي اللي عايزه كل حاجة بسرعه بشوية طرق كده حتى الآن ناجحه و طبعاً استفدت جداً ببعض الاقتراحات اللي بعض الناس سابتهالي في التعليقات. ده مهم جدا الحقيقة لأن دي اصعب حاجة في الريجيم هي ان الواحد اول مايحقق اي انجاز يحس بالسعادة و ساعات كمان بيبقى عايز يكافئ نفسه بأكله جامدة - مكرونه بالبشاميل مثلاً :) - لكن ده من اخطر ما يكون لأن ده معناه انك محروم من اكل معين و انت مستنى ترجعله بأسرع وقت ممكن و في الاغلب في اللحظة دي بتضعف و ترجع تاكل واحده واحده من تاني.

اهم حاجة باعملها دلوقتي هي اني بافكر في النقاط التالية و اللي بتساعدني جداً في تجنب الاحباط (لحين اشعار آخر)

  • التفكير في اني اكلت اللي نفسي فيه عشرات السنين و كانت النتيجة ان اصبحت بالمنظر ده و ده معناه ان اللي نفسي فيه ده مش بالضرورة المناسب ليا!
  • اني افكر في ان الدايت مش عقاب لكن اسلوب حياه و بافكر نفسي دايماً ان اسلوب الحياه ده فعلاً مخليني حاسس اني احسن كتير حتى بعد التزامي بيه بإسبوع واحد، احساسي بالخفه طول الوقت و النشاط دايما و ان مشاكل الهضم قلت كتير
  • ان فيه ناس كتير هاتقول عليا فاشل عشان هاكون خسرت التحدي و دي بالنسبالي حاجة كبيره جداً اني اخذل مئات الاشخاص اللي بيدعموني
  • اني افهم الموضوع بشكل علمي، انا كل ما بفهم الموضوع بشكل علمي اكثر باتحمس اكثر و بيكون عندي فرصة في اني اعمل تغييرات في النظام الغذائي في اي وقت بدون ما احس اني مكبوت او اني محرج وسط الناس لو في عزومة او خارج في اي مشوار
  • بفكر في كل المزايا اللي هاخدها لما يكون وزني قريب من الوزن المثالي و ان آلام الضهر و الركبه دي هاتكون من الماضي و اني هاقعد افتكر الايام دي و اقول " ياااه انا ايه اللي كنت عامله في نفسي ده!" و ان شاء الله نهاية احساسي بالخمول. كمان مشكلتي الكبيرة فعلا - من غير ضحك لو سمحتوا - اللبس! ايوه انا باشتري اللبس بصعوبه شديدة عشان اللي نفسي فيه ٩٠٪ من الوقت مش بيكون مقاسي و لو مقاسي بيبقى شكله لامؤاخذة "مفشول" عليا :)
  • ان الاكل الدايت مش لازم يكون وحش و فيه اكلات لذيذة جداً و سعراتها قليله جداً

سبب تاني للموضوع هو اني بانسى الملل و الاحباط لما بانسى اصلاً عامل دايت، العبقرية هي ان الدايت يتحول انه يكون الطبيعي و ان الدايت يكون هو الاكل التقيل الشنيع اللي كنت باكله ده!

خلال تجربتي دي و نصايحكم هاجمع الافكار اللي فعلاً فرقت معايا و هاعمل بيها مقاله مستقله ان شاء الله. و ربنا يقوينا :)